بولی ووڈ فلم ویر زارا میں کام کرنے کی پیشکش ہوئی تھی! نادیہ جمیل

28جون2019
(فوٹو فائل)

ویب ڈیسک: (کراچی) معروف پاکستانی اداکارہ نادیہ جمیل نے انکشاف کیا ہے کہ انہیں بولی ووڈ فلم ’ویر زارا‘ میں کنگ خان کے ساتھ کام کرنے کی آفر ہوئی تھی لیکن انہوں نے کریئر پر اپنے بچوں کو تر جیح دیتے ہوئے فلم میں کام کرنے سے انکار کر دیا۔

میڈیا رپورٹس کے مطابق چند روز قبل اداکارہ نادیہ جمیل نے پاکستانی اداکارہ ثمینہ پیرزادہ کے شو ’ریوائنڈ ود ثمینہ پیرزادہ‘ میں شرکت کی جہاں انہوں نے اس بات کا انکشاف کیا کہ کریئر کے عروج میں اُن کی ملاقات بھارتی ہدایت کار یش چوپڑا سے ہوئی، انہوں نے فلم ’ویر زارا‘ میں رانی مکھرجی کے کردار کی آفر کی تھی لیکن نادیہ جمیل نے انکار کر دیا۔ اداکارہ نے انکار کی وجہ بتاتے ہوئےکہا کہ ’جس وقت مجھے فلم میں کام کی آفر ہوئی اُس وقت میرا بیٹا 2 ماہ کا تھا، اُس کا خیال میری امی رکھتی تھیں، پھر جلد مجھے احساس ہوا کہ اگر میں نے ایک مرتبہ فلم کیلئے ہاں کر دی تو مجھے اس کی عادت ہو جائے گی اور پھر اسے چھوڑ نہیں پاؤں گی۔

انہوں نے مزید کہا کہ اُس وقت میں نے فیصلہ کیا کہ یا تو میں ایک ماں بن جاؤں یا پھر اداکارہ، اور پھر میں نے ماں کا انتخاب کیا اور یہ کردار ادا کرنے سے انکار کر دیا۔ نادیہ جمیل نے مزید بتایا کہ فلم ’ویر زارا‘ میں پہلے شاہ رخ خان، ایشوریہ رائے اور اُنکو (نادیہ جمیل) کاسٹ کرنے کا فیصلہ کیا گیا تھا لیکن پھر کاسٹ تبدیل ہوئی اور شاہ رخ خان کے مقابل ہیروئن کا کردار پریتی زنٹا نے ادا کیا جبکہ رانی مکھر جی اس فلم میں وکیل کے روپ میں نظر آئی تھیں۔

واضح رہے کہ چند روز قبل پاکستانی اداکار دانش تیمور نے بھی انکشاف کیا تھا کہ انہیں فلم ’ویرے دے ویڈنگ‘ میں کرینہ کپور کے مقابل کام کرنے کی پیشکش ہوئی تھی۔ دانش نے بتایا کہ فلم کی شوٹنگ کا آغاز ہونے ہی والا تھا کہ معلوم ہوا کرینہ حاملہ ہیں پھر یہ فیصلہ ہوا کہ بچے کی پیدائش کے بعد فلم کی شوٹنگ کا آغاز کیا جائے گا۔

دانش تیمور نے کہا کہ کرینہ کے ہاں بیٹے کی پیدائش 2016ء میں ہوئی اور تب پاکستان اور بھارت کے درمیان حالات کافی کشیدہ تھے جس کے باعث وہ یہ فلم نہیں کر سکے۔

Facebook Comments