بھارتی ریاست جودھ پور کی عدالت نے سلمان خان کے گرد گھیرا تنگ کرنا شروع کر دیا

06جولائی2019
(فوٹو دی رہنما ڈیلی)

ویب ڈیسک: (ممبئی) تفصیلات کے مطابق کالا ہرن شکار کیس میں سزا کے خلاف دائر ہونے والی درخواست کی جودھ پور کی عدالت میں سماعت ہوئی جس میں جج نے دبنگ خان کی عدم حاضری پر برہمی کا اظہار کیا۔

جج نے استفسار کیا کہ درخواست گزار خود کہاں ہے؟ کیونکہ اُسے گزشتہ روز کی سماعت پر پیش ہونا تھا اور آج بھی اُس نے عدالت آنے کی زحمت تک نہیں کی۔ سلمان خان کے وکیل ہستی مل سارسوت نے عدم حاضری پر عدالت سے معافی مانگتے ہوئے استشنیٰ کی درخواست دی جس پر جج نے ناراضی کا اظہار کیا اور وکیل کو بھی جھاڑ پلائی۔

جج نے سوال کیا کہ آخر سلمان خان کے ساتھ مسئلہ کیا ہے؟ وہ کیوں عدالت کا احترام نہیں کرتے؟ اگلی پیشی پر اگر انہیں پیش نہیں کیا گیا تو ضمانت منسوخ کر کے گرفتاری کا حکم جاری کیا جائے گا۔ عدالت نے 27 ستمبر کو ہونے والی اگلی سماعت پر سلمان خان کی حاضری کو ہر صورت یقینی بنانے کی بھی ہدایت کی۔

یہ بھی ملا حظہ کیجئے : سلمان خان نے بگ باس 13 کیلئے معاوضہ دوگنا کر دیا

یاد رہے کہ سلمان خان سمیت دیگر اداکاروں پر الزام ہے کہ انہوں نے 1998 میں نایاب نسل کے کالے ہرن کا شکار کیا تھا، گزشتہ برس پانچ اپریل کو ٹرائل کورٹ نے سلمان خان کو پانچ برس قید کی سزا سنائی تھی جس کے بعد انہیں دو راتیں حوالات میں بھی گزارنا پڑی تھیں۔ بعد ازاں سلمان خان نے فیصلے کو ہائی کورٹ میں چیلنج کرتے ہوئے درخواستِ ضمانت دائر کی تھی اور یقین دہانی کرائی تھی کہ وہ ہر پیشی پر باقاعدگی کے ساتھ پیش ہوں گے۔

Facebook Comments