وزیر اعظم عمران خان نے نیا پاکستان ہاؤسنگ اسکیم کا افتتاح کر دیا

17اپریل2019
(فوٹو فائل)

ویب ڈیسک: (اسلام آباد) وزیرِ اعظم عمران خان نے نیا پاکستان ہاؤسنگ اسکیم کا افتتاح کر دیا ہے، انکا کہنا ہے کہ ریاست کی پالیسیاں نچلے طبقے کی غربت کم کرنے کے لیے بنتی ہیں، ہم مختلف جگہوں پر ہاؤسنگ اسکیموں کا افتتاح کرتے رہیں گے۔

تفصیلات کچھ اس طرح ہیں کہ اسلام آباد میں نیا پاکستان ہاؤسنگ اسکیم کی افتتاحی تقریب سے خطاب کرتے ہوئے عمران خان نے کہا کہ تبدیلی کے سامنے سب سے بڑی رکاوٹ مفاد پرست ٹولہ ہے، اصلاحات کرتے ہیں تو پرانے سسٹم سے فائدہ اٹھانے والے رکاوٹ بنتے ہیں۔ وزیرِ اعظم نے کہا کہ وہ کون لوگ ہیں جو پہلے دن سے شور مچا رہے ہیں کہ حکومت نا کام ہو گئی، شور مچانے والے یہ وہ لوگ ہیں جو پرانے نظام سے ارب پتی بن گئے۔

عمران خان نے اسٹیٹس کو پر ایک بار پھر تنقید کرتے ہوئے کہا کہ پاکستان میں تبدیلی کے راستے میں یہ بڑی رکاوٹ ہے، ہم کوشش کر رہے ہیں کہ نچلے طبقے کو ترقی دیں، ہماری حکومت کو ابھی صرف 8 سے 9 ماہ ہوئے ہیں اور کہا جا رہا ہے کہ ہم ناکام ہو گئے ہیں۔ انھوں نے کہا کہ حکومت کا 50 لاکھ گھروں کا ٹارگٹ بہت اہم ہے، ہمیں اپنی آبادی کنٹرول کرنا پڑے گی اس میں کوئی شک نہیں، آج تک کچی آبادیوں کے لیے کسی نے نہیں سوچا، کراچی کے 40 فی صد لوگ کچی آبادی میں رہتے ہیں، بلوچستان میں ایک لاکھ گھر بنا رہے ہیں، آزاد کشمیر میں 6 ہزار گھر بنائیں گے۔

وزیر اعظم کا کہنا تھا کہ بلا سود قرضوں کے لیے 5 ارب روپے مختص کیے ہیں، قوم سے کہنا چاہتا ہوں کبھی گھبرانا نہیں مشکل وقت سے نہیں ڈرنا، مشکل وقت قوم کو مضبوط کرنے اور اوپر اٹھانے کے لیے آتے ہیں، میری سازی زندگی اونچ نیچ میں گزری ہے، آج اللہ نے موقع دیا ہے نچلے طبقے کے لیے اصول بنائیں گے۔

Facebook Comments