سال 2020ء سے پرواز کر کے سال 2019ء میں لینڈ کرنے والے طیارے

Planes to land in 2019 flying from 2020
03جنوری2020
(فوٹو بشکریہ ٹریفک ڈاٹ او آر جی)

ویب ڈیسک: ہر گزرتا لمحہ ہماری زندگی سے جب نکل جاتا ہے تو دوبارہ واپس نہیں آتا اور ابھی تک سائنسدان وقت کا سفر کرنے والی مشین بھی تیار کرنے میں کامیاب نہیں ہو سکے ہیں۔ مگر کیا آپ سوچ سکتے ہیں کہ کچھ افراد 2020ء سے چھلانگ لگا کر واپس 2019ء میں چلے جائیں؟

کم از کم ٹوکیو سے لاس اینجلس سفر کرنے والے افراد کے ساتھ ایسا ضرور ہوا ہے۔ جی ہاں آل نیپون ائیرویز کی پرواز این ایچ 106 کے مسافروں کے ساتھ یہ حیرت انگیز واقعہ پیش آیا اور وہ 2020ء سے پرواز کر کے واپس 2019ء میں چلے گئے۔

ہوائی پروازوں پر نظر رکھنے والی ویب سائٹ فلائٹ ریڈار 24 نے ایک ٹوئٹ میں یہ انکشاف کیا کہ این ایچ 106 نے ٹوکیو سے یکم جنوری کی رات 12 بج کر 24 منٹ پر اڑان بھری، یعنی اس وقت مسافر نئے سال کا آغاز کر چکے تھے۔

یہ بھی ملاحظہ کیجئے: چوبیس سال تک طیارے کی صفائی کرنے والا شخص پائلٹ بن گیا

اور یہ پرواز لاس اینجلس میں 31 دسمبر کی شام 5 بجے کے قریب لینڈ ہوئی کیونکہ ٹوکیو اور لاس اینجلس کے وقت میں 17 گھنٹے کا فرق ہے۔ یہ پرواز 9 گھنٹے 55 منٹ میں ٹوکیو سے لاس اینجلس پہنچی تھی اور 2020 سے چھلانگ لگا کر ایک بار پھر 2019 کی دہائی میں چلی گئی۔

یہ بھی ملاحظہ کیجئے: بغیر کھڑکی والے طیارے اسکرینز پر باہر کا پورا منظر دکھائیں گے

یعنی اس پرواز میں سوار افراد نے 2 بار نئے سال کا جشن منایا ہو گا۔ ویسے یہ واحد پرواز نہیں ائیرنیوزی لینڈ کی پرواز اے این زی 40 کے مسافروں کو بھی یہ موقع ملا۔ یہ پرواز آک لینڈ سے بحراوقیانوس میں فرانسیسی پولینیشیا کے دارالحکومت پاپیٹی روانہ ہوئی تھی، یکم جنوری کو روانہ ہو کر 31 دسمبر کو اپنی منزل پر پہنچی کیونکہ دونوں کے درمیان وقت کا فرق 23 گھنٹے کا تھا۔

یقیناً گیا وقت پھر واپس لوٹ کر نہیں آتا مگر اس طرح کے عجیب و غریب وقت کے حساب سے ایسا ممکن بھی ہو جاتا ہے۔

Facebook Comments